УКИиК

1 ноябрҙә, Халыҡтар берҙәмлеге көнө алдынан, Рәсәйҙә “Ҙур этнография диктанты” Бөтә Рәсәй акцияһы үтте. Был сараға Рәсәйҙең барлыҡ субъекттарында һәм сит илдәрҙә ҡушылдылар. “Ҙур этнографик диктант” акцияһынан учалылар ҙа ситтә ҡалманы. Салауат Низаметдинов исемендәге Учалы сәнғәт һәм мәҙәниәт колледжы белемдәрҙе һынау майҙанына әйләнде. Билдәләнгән ваҡытҡа байтаҡ яҡташыбыҙ йыйылғайны. Илебеҙҙә бындай диктант яҙыу дүртенсегә ойошторола һәм ул этнографиянан белем кимәлен, Рәсәйҙә йәшәүсе халыҡтар тураһында мәғлүмәтле булыуҙы баһаларға ярҙам итә. Башҡортостанда акцияны республиканың Мәҙәниәт министрлығы, Мәғариф һәм фән министрлығы, Халыҡтар дуҫлығы йорто ойошторҙо.

Колледждың ойоштороу комитеты ҙур әҙерлек эше үткәрҙе. Был акцияла ҡала һәм райондың 86 төрлө ойошмалары вәкилдәре ҡатнашты. Диктантта барлығы 30 һорау бирелде, уларҙың 20-һе барыһы өсөн дә уртаҡ булһа, ҡалған 10-һы айырым төбәккә ҡағылды. Диктантты яҙыуға 45 минут бирелде. Салауат Низаметдинов исемендәге Учалы сәнғәт һәм мәҙәниәт колледжы уҡытыусылары һәм студенттары белемдәрен һынау менән генә сикләнмәнеләр, ә килгән ҡунаҡтарға Рәсәй халыҡтарының этник биҙәүестәрҙен, костюмдарын да күрһәттеләр. Сара бик сағыу булып иҫтә ҡалды.