УКИиК

      Пандемия сәбәпле оҙайлы каникулдарҙан һуң Учалы ҡалаһында 1 март көнө Ф.Ғәскәров исемендәге Дәүләт академия халыҡ бейеүҙәре ансамбленең концерты уҙҙы. Данлыҡлы ансамблдә С.Низаметдинов исемендәге Учалы сәнғәт һәм мәҙәниәт колледжының Хореография бүлеген тамамлаған студенттар ҙа эшләй. 

  Улар Эльвира Муллағолова, Рәзилә Билалова, Нәркәс Нәбиева, Дамир Ваһапов һәм Башҡортостан Республикаһының атҡаҙанған артистары Марат Яҡупов менән Фәрхәт Хәкимов. Филармонияла уҙған концерттан тыш бейеүселәр шулай уҡ үҙҙәренең уҡыған колледжында ла булдылар, студенттарға мастер-класстар уҙғарҙылар, профессиональ ансамблдә эшләүҙең төп бурысы хаҡында ла һөйләнеләр. Студенттарға үҙҙәренең өҫтөндә тағы ла нығыраҡ эшләргә һәм тик көсөргәнешле эш һөҙөмтәһендә генә бейек үрҙәрҙе яулап була икәнлеген иҫбатлап стимул өҫтәгәндәре өсөн ҙур рәхмәт. Беҙҙең сара филармонияла уҙған концерт менән тамамланды. Юғары профессиональ кимәлдә ҡуйылған төрлө бейеүҙәр Учалы тамашасыһында һоҡланыу уятты.